(La Voz de Galicia) O Celta Fortuna abre a xornada 22 en Primeira Federación este sábado (16.00 horas) visitando ao Cornellá, un rival en apertos clasificatorios, pero que levou os tres puntos no duelo da primeira volta en Balaídos, a pesar de que os locais comezaran por diante no marcador aquel choque da terceira xornada (1-2). Os dous equipos medirán as súas series negativas: tres derrotas seguidas no caso dos vigueses e catro no dos cataláns.

A mala dinámica dos de Claudio Giráldez non lles impide seguir moi ben situados na clasificación, con 38 puntos e a dous do líder, a Ponferradina como recalcaba o técnico porriñés tras o máis recente deses tres tropezos. Con todo, úrxelles reencontrarse cos bos resultados e deixar atrás esta mala serie para non seguir cedendo terreo aos seus inmediatos perseguidores.

Afrontan este compromiso coa baixa de Javi Rodríguez, que cumpre ciclo de amarelas, e sen Iván López, que se desvinculaba no último día de mercado tras perderse por lesión o últimos quince partidos. Con este movemento e o cambio de Miguel Rodríguez a licenza do primeiro equipo, púidose cumprir o desexo de Giráldez de que Manu Fernández e Yoel Lago pasen a ter ficha do Fortuna, o que lle facilitará a xestión dos canteiráns do Celta Gran Peña. Deste equipo foron citados Pablo Meixús, como novidade, e David de la Iglesia, Dela e Lucas Antañón, que repiten. Tamén o fai Hugo Álvarez, tras baixar a pasada xornada. No capítulo de baixas, Manu Garrido súmase Coke Carrillo -primeiro equipo- e os lesionados Gael Alonso e Víctor San Bartolomé.

O Cornellá, pola súa banda, é décimo quinto, fóra do descenso, pero empatado a 21 puntos co equipo que marca a zona vermella, o Sabadell, que xa foi capaz de gañar ao Fortuna fai dúas xornadas. A pesar da delicada situación na que levan todo o curso manteñen ao seu adestrador, Gonzalo Riutort. No seu campo, veñen de perder ante o Sabadell, pero é onde sumaron 15 dos seus puntos -de 30 posibles-; a súa única vitoria a domicilio foi a de Vigo. O Celta Fortuna, pola súa banda, vén de perder fóra tras encadear catro vitorias a domicilio. O seu balance como visitante é de 20 puntos de 33 posibles.

O único precedente entre estes dous equipos é o partido da primeira volta, disputado o 9 de setembro. Raúl Blanco adiantou aos vigueses ao fío da media hora, pero Mamor e Clau Mendes remontaron na recta final do partido. Tras ese duelo, Claudio Giráldez sinalou que lles ía a custar moito manter a categoría, unhas palabras que non foron preludio do que estaba por vir, xa que o filial está a asinar unha gran campaña pese á fochanca actual.