(La Voz de Galicia) O técnico do Celta Fortuna, Claudio Giráldez, caracterízase por mirar cara abaixo na estrutura da canteira do clube vigués. Quedou claro a tempada pasada e dúas xornadas bastaron para comprobar que segue na mesma liña. As dúas primeiras convocatorias contaron cun bo puñado de representantes do Celta Gran Peña, segundo filial, que milita na Terceira Federación e que aínda non empezou a competición oficial, e en cada un deles debutou un xogador con ficha do conxunto de Fredi Álvarez.

Así, fronte á Ponferradina estreouse Mario Fuente (2004), canteirán do Oviedo fichado polo clube este verán. Foi o último cambio, saíndo en substitución de Pablo Durán aos 81 minutos de partido. Este sábado, foi a quenda de Manu Fernández (2001), fillo e neto de excélticos (Manuel Fernández Amado e Manel Fernández Anidos) que chegou no seu día á canteira do Celta desde o Racing de Ferrol e regresou para integrarse no Gran Peña hai ano e medio tras pasar polo Alavés e o San Ignacio.

Ademais deles dous, entraron nas dúas convocatorias Javi Piay e Lucas Antañón e, nesta última, Mario Cantero, todos eles xogadores con ficha do Gran Peña. A maiores, pasaron a ter ficha do B esta tempada César Fernández e Fer López, que o ano pasado tíñana do Xuvenil A, e Damián Rodríguez, Javi Rodríguez e Gael Alonso, que a tiñan do segundo filial o curso pasado.

Giráldez saliu ante o Tarazona un once con oito galegos, tres que non son canteiráns (Coke Carrillo, Pablo Durán e Miguel Román) e cinco que si (Gael, Damián, Raúl Blanco, Javi e Hugo Álvarez). Desde o banco saíron os canteiráns Fer e Tincho Conde -que deu a asistencia de gol- e Manu Fernández. O porriñés mostrábase en rolda de prensa especialmente satisfeito por estes datos.